نحن النسوة

طبعا أغلب الناس سمعت عن بلوج " كلنا ليلى " وهو حاجة كدة زي حركة
بناتية ولا اقول نسائية ....لأن أغلب مؤسسين الحركة بنات...واليومين دول البنات مش بيحبوا يتقال عليهم نسوة ولا نسوان ولا حريم...مش عارف ليه بالظبط..مع إنها ألفاظ بتوصفهم وليس ألفاظ تنقص من قدرهم .. ما علينا ...المهم إن حركة " كلنا ليلى " بتوصف مدى بشاعة وقسوة المجتمع الذكوري اللي بيظلم البنت من لحظة ولادتها وحتى لحظة وفاتها مرورا بالمدرسة والكلية والجواز ...إلخ إلخ.....

وطبعا كل البلوجيات المبجلات ..مكدبوش خبر ...وكل واحدة فيهم كتبت بلوج محترم...يمكن يكون أطول بلوج كتبوه في حياتهم البلوجية المديدة ... وكل واحدة أسهبت وفصلت وتعرضت لكل مراحل العذاب في حياتها كأنثى.. وكانت دايما في حاجات مشتركة دايما في كل بلوج بقراه من نوعية :

- اشمعنى ملعبش مع الولاد وانا صغيرة

- ليه اخويا الولد بيسهر ولنل مش بسهر براحتي

- لي مش من حقي أرجع البيت بالليل متأخر .

- لي مش من حقي ان أعمل علاقات واحب ولاد قبل الجواز

- ليه دايما نجاح البنت باهت مهما كان كبير

وحاجات تانية كتير قوي من العذابات المتواصلة ..... انا بصراحة مش عارف أقول ايه .انا كنت هعييط وانا قاعد أقرا الكلام ده.......انا ليا تعليق يمكن يكون غريب او متخلف في وجهة نظر كتير ...بس هقوله وأمري لله ...

البنت دايما عندها إحساس بالنقص عن الراجل .. ليه ..؟

لإن فعلا هية دي الحقيقة البنت فعلا ناقصة عن الراجل في حاجات.... هية حاجات مش كتير ...زي إيه ...زي مثلا بنيان الجسم ...البنت أضعف من الراجل ودي حقيقة علمية محدش يقدر ينكرها.... حتى لو كانوا همة الإتنين في نفس الجسم ...لكن أكيد الغلبة الجسمية دايما للراجل ....دي حاجة

الحاجة التانية ..البنت اعصابها أضعف من الراجل بكتير ...ودي بقى خلقة ربنا...منقدرش نعمل فيها حاجة .... ودايما الدموع عندها قريبة ... مش زي الولد...اعصابه غالبا بتكون أنشف ...ومشاعره يقدر يمسكها كويس .....

لكن في المخ والتفكير ...الشهادة لله....الإتنين زي بعض ...يعني قصدي ....منقدرش نقول البنات أذكى....أو الولاد أذكى ....لإن المخ ده هوة الحاجة اللي ربنا ساوى فيها بين كل البني آدمين ....عشان يكونوا كلهم مكلفين ...يعني يوم القيامة كلهم سواء ...لأن الاتنين مخهم واحد.....مفيش جنس هيكونه حسابه مختلف عشان مخه تعبان عن الجنس التاني .....

طيب لو فرضنا ان في أب سمح لبنته انها تخرج بالليل متأخر....هتكون ايه النتيجة...تحرشات كتيرة جدا ....يمكن توصل لمحاولة التطاول باللمس أو الجذب ....أو حتى الخطف ....حتى لو كانت لبسها محترم....ليه ...لأن المجتمع بتاعنا مجتمع مبقاش فيه قواعد تحكم سلوكه ... يعني مبقاش الحجاب معناه الاحترام ...لا ده ممكن يكون قناع عشان البنت تعمل اللي هية عايزاه...ودي نماذج كتير بدأت تظهر دلوقتي....طبعا هية حالات مش كتير ...بس بتكون باينة قوي ... المشكلة ان الأهل فهموا البنات الحجاب غلط .... هو مجرد غطاء للرأس.....تييجي البنت من دوول تروح مغطية راسها من غير ما تعرف ايه اللي مفروض تعمله وايه اللي ميتعملش.....ايه الصح وايه الغلط.....عشان كدة تلاقي المناظر اللي بتشوفها على كورني المنيل والمعادي ...أو في أي ركن ضلمة .... والواحد يشوف المنظر ... ويكون عايز يشد الطرحة من فوق راس البنت لإنها ملهاش لازمة ......

ناس هتقوللي طيب ليه الولاد تعمل كدة أصلا ...مفيش تحضر ...مفيش تقدم ....طبعا هرد عليهم بحاجة واحدة ....بصوا برة في الدول الأجنبية اللي عندهم التحرر على أشده ...وعنهم بنات الليل ممكن ييجوا ديليفري لحد البيت ....بس برده عندهم تحرش جنسي ...سواء في الشغل او الشارع ..او حتى في البيت من أهلهم.....وطبعا جرايم الإغتصاب على ودنه ....يعني برده لا نفع معاهم تقدم ولا حضارة ولا يحزنون.....

المشكلة جوانا احنا....جوانا كمجتمع مش عارف يربي ولاده ولا بناته....
...

أنا حاسس ان الموضوع وسع مني ....وفي حاجات كتير جوايا عايز أكتبها......فهكمل بعدين