MeMoRiEs

Sunday, September 03, 2006

تعليق يا فاعل الخير والثواب

ليه كل الناس او بالأصح المدونين أنفسهم بقو معتبرين البلوج ضرورة من ضرورات الحياة اليومية ... مع اني فاكر ان البلوج اول ما ظهر مكانش المفروض انه يكون بالدرجة دي من العلنية ....انا لما قريت عن البلوج قريت انه يعتبر صفحة شخصية ... ممكن الواحد يكتب فيها اللي هوة عاوزه او يقول فيها كل اللي في نفسه ...زي اليوميات اللي كان في بعض الناس بيكتبوها زمان ...

بس الفرق ان زمان كان الناس بيعتبروا اليوميات دي حاجة شخصية جدا .. ممكن يتفننوا ازاي يخبوا الكراسة او الكشكول اللي كانوا بيكتبوا فيه يومياتهم لحسن يقع في ايد حد كدة ولا كدة ...مكانش الواحد مستني او متوقع ان ممكن ييجي اليوم اللي الآية تتقلب فيه ويبقى اليوميات اللي المفروض ان شكلها بس هوة اللي اتغير وبقت إلكترونية تبقى علنية ...ممكن كل الناس تقول فيها رأيها ...وتنقدها....لأ وكمان تقدملك إقتراحات عشان تطور من نفسك وكتاباتك....حاجة غريبة جدا.....

وبعدين في مدونات الكلام اللي فيها ركيك جدا ...ومفهوش اي حاجة كويسة ممكن تتقري...ومع ذلك تلاقي كل التعليقات من نوع "بصراحة إسلوبك جميل " أو "ايه الكلام الجميل ده " أو "بصراحة إحساسك عالي جدا" ...وطبعا كل الكلام ده موجه لمدونات بنات ....انا حاسس ان غرف الدردرشة ... وبنامج الأي سي كيو ....رجعوا تاني ...بس في شكل أكثر جدية ...ولكن في أصله هو بنفس الهزلية ....

مش معنى كدة ان كل المدونين كدة ...(ولو ان كلمة مدونين بتخنقني أصلا)....لأ... في منهم فعلا بيكتبو اللي همة عايزينه....مش اللي الناس عايزة تقراه....في بعض المدونات اللي بحترمها جدا ...أصحابها بيكتبوا فيها كل يوم ....مع إن التعليقات ممكن تكون صفر ...أوبالكتير تعليقين...لكن ...مش بيروحوا يجروا ويعلقوا في كام مدونة..عشان الناس تيجي تعلق عندهم .....دول ناس فهموا البلوج صح....

لا واللي يغيظ اكتر ان في ناس بكل بجاحة بتيجي وتطلب منك ان تزور البلوج بتاعهم وتكرمهم بتعليق ولا اتنين...كأنه بيشحت التعليق ...حاجة غريبة والله...

12 Comments:

  • At 5:23 AM , Blogger Mohamed Mehrez said...

    طيب ممكن أعلق؟؟ :D

    بص يا سيدي...الكلام اللي انت قلته بشأن تصرفات بعض المدونين انا متفق معاك فيه

    لكن مختلف معاك في نظرتك للبلوج...نظرة كل صاحب مدونة لمدونته ده شيء بيختلف من واحد للتاني
    يعني الهدف من المدونة ده بيختلف من شخص لشخص

    انت شايف ان المدونة زي المذكرات الشخصية اللي كانت الناس بتكتبها زمان من غير ما توريها لحد...طيب ازاي يتحقق الشرط ده في المدونة إذا كانت موجودة في فضاء مفتوح؟؟؟

    من الآخر الهدف من المدونة ممكن يكون كتابة يوميات..وممكن يكون واحد هدفه انه يتواصل مع ناس تانية خصوصا لو لهم نفس الفكر، زي ما بنشوف مدونين عملوا مع بعض مدونات مشتركة...وفي ناس بتشوف في المدونة منبر سياسي وتلاقي كل المدونة موضوعات سياسية ومتلاقيش فيها اي موضوع شخصي

    يعني المدونة عبارة عن مكان للكتابة والشخص اللي بيكتب هو اللي بيحدد الهدف منها

    فل يا باشا؟؟؟
    مش عاوز اشوفك عندي بقى ههههههه

     
  • At 12:45 PM , Blogger Lasto-adri *Blue* said...

    اه يا سلاطينو انا مع محرز فى اللى قاله الحقيقة

    واحب بجد أكد على خنقتى من التعليقات بتاعة ونبى علق عندى ينوبك ثواب!!!


    بس ح قول لك حاجة
    زمااان اول ما بدأت كان بيهمنى اشوف الناس تعلق... كان شبه بدور على الثقة فى النفس
    لاء صدقنى... كنت بدور على حياة أخرى وتواصل من نوع جديد
    وحصل انى اتعرفت على مجموعة لا بأس بها
    بس مع الوقت مابقاش يهمنى التعليقات بالعدد لكن بالكيف
    يعنى حتى نضج فكرى بالنسبة للتعليقات

    فاماتستفزش قوى من الناس اللى بتبحث على تعليقات عشات خقيقى بعد حبة ح -خلينى اقولها كدة- يزهدوا فى التعليقات للشكل اللى يهمهم الجودة بقى .. ان ماكنش ح يقفلوه


    وكلامى عن تجربة على فكرة


    بس يا سيدى، ولو انت حابب تعمله زى تفتر يومى... عمله براحتك

    عن نفسى اختارت البلوج بتاعى يكون أشبه باجبار انى اكمل نصوص على بعض... وفى النص كلام ودى بينى وبين غيرى للتواصل الانسانى بس

    ممم.. ساعدنى البلوج انى اعرف نفسى اكتر، ولو انى قفلت بلوج آخر كنت فتحته للحوارات الشخصية... لانه بصراحة عرفت نفسى اكتر مما يجب للدرجة اللى كرهت نفسى فيها ... فاقلت بلاها احسن

    وكفاية عليك كل التعليق دة
    سلامى ليك امانة

     
  • At 11:43 PM , Blogger salateenoo said...

    محمد محرز :

    انا معاك ان نظرتي للبلوج مختلفة شوية...يمكن لان فكرة البلوج نفسه كانت شخصية شوية ... بس على رايك الناس ما بتصدق تلاقي وسيلة تتواصل بيها مع بعض....خصوصا ذوي الميول المشتركة.... بس انا حاسس ان الموضوع خرج شوية من الإطار ده .... انا كنت زمان يعني سنة 98 و99 اول ما عرفنا حاجة اسمها انترنت كان الأي سي كيو وال إم أي أر سي كان زي البلوج كدة ...ضرورة يومية ....يعني كنا ساعات انا وصحابي مش بنخرج عشان نقعد نتشات ونتواصل ....يتهيألي كلنا مرينا بالفترة ....عشان كدة انا كنت متخيل البلوج حاجة مختلفة ....

    عموما الختلاف في الرأي لا يفسد للود قضية ...ولولا إختلاف الأذواق ..لبارت البلوجات ولا ايه :)

    وبعدين مين قالك اني هاجي عندك أصلا :D

    لست أدري :

    هوة يمكن الواحد مش بيكون فاهم نفسه قوي إلا لما بيرتب الأفكار بتاعته ويعملها في شكل موضوع أو مواضيع منظمة يقدر منها يقرا نفسه كويس....يمكن الواحد فعلا مش بيعرف هوة ايه اللي جواه غير لما يقعد ويكتبه....

    عموما انا اللي باسطني شويتين ان لست أدري بجلالة قدرها في مجتمع المدونين حضرت وعلقت في بلوجي المتواضع ...

    شكلي هبدأ أغير رأيي وأحب التعليقات على البلوج...

     
  • At 3:11 AM , Blogger Lasto-adri *Blue* said...

    لست ادرى بجلالة قدرها
    !!!!!!!

    دا انا اصغر منك!! صحيح مش كتير يعنى بس اسمى اصغر منك
    آل جلالة قدرها آل وبتاع

    :S

    بس التعليقات مش بتكون وحشة على فكرة بالعكس بتفيدك ... خصوصا ح قول لك على موقف.. لو متابع البلوج بتاعى الفترة اللى فاتت كان اغلب اللى بكتبه يائس وانهزامى كدة.... عشان ظروف بمر بيها.. بس صدقنى مش قادرة اقول لك على الهوجة اللى حصلت فى الايميل بتاعى ايامها.. والحمد لله حاسة انى بدأت اشوف الدنيا بمنظور مختلف


    يلا ربنا يوفقك وتجبلنا سلاطينوا صغير بقى

     
  • At 4:40 AM , Blogger salateenoo said...

    لست أدري:

    كان قصدي بجلالة قدرها هو قدرك البلوجي المتميز ...حيث إنك من أنشط البلوجرز اللي موجودين...يعني باين من كم التعليقات وكم اللينكات اللي بتلينك على البلوج بتاعك...(ده مش قر والله)...:)

    عموما انا هعيد نظر في موضوع البلوجز والتعليقات ...يمكن دي تكون أول إشارة ان التعليقات ممكن تساهم في تكوين فكرة معينة الواحد مكانش مقتنع بيها ... بدليل إن تعليقك هيخليني أعيد نظر....عموما متشكرين للإهتمام....

    وعقبالك لما تجيبي "لست أدري صغنطوط"...ولا أقولك خليه يكون "أدري...."...يتهيألي يكون أحسن

    :)

     
  • At 5:24 AM , Blogger Jannah said...

    معقوله فى ناس بتطلب تعليقات على البلوج بتاعها؟

    للنسبة لى بما انى لسه فاتحه البلوج بتاعى من شهر, الهدف هو انى اكتب حاجات فى بالى و اقراها بنفسى و اكتشف فين اللخبطة و انظمه, وعشان كده سميته
    scribbling mind

    عن الناس اللى بتعلق فهم بيعملوا نوع من دعم معنوى, وكمان لاحظت ان ناس كثير جدا بتيجى بس مش بتعلق اصلا ف مش فارقه للنسبة لى نهائى غير انى يمكن بعد مرور الوقت اقدر افهم نفسى اكثر. الله المستعان

     
  • At 5:26 AM , Blogger Jannah said...

    على فكرة
    your page design
    تحفه من الجمال, اول شكل اشوفه يشدنى كده ما شاء الله.

     
  • At 5:50 AM , Blogger salateenoo said...

    Jannah :

    بالنسبة لموضوع ان في ناس ممكن تطلب التعليق ...للأسف فيه..وأكيد هتشوفي الموضوع ده في الأيام اللي جاية...

    وبالنسبة للتصميم ...انا بشكرك جدا على ذوقك الرفيع ...وعلى فكرة انا ممكن أدلك على أماكن تقدري تجيبي منها تصميمات حلوة للبلوج بتاعك....ومتقلقيش الموضوع ده هيكون
    Free of charge :)

     
  • At 10:46 AM , Blogger still breathing said...

    حلوة حكاية بيشحتوا تعليق دي

    الحكاية و ما فيها ان في ناس بتعشق التواصل....هما عايشين عليه أصلا... فا مينفعش يكتبوا و محدش يقرا و اللي يقرا لازم يقول ان الكلام جميل والأسلوب رائع

    بس برضه مين يعني ميحبش الناس تتفق معاه؟

     
  • At 4:00 PM , Blogger Jannah said...

    متشكرة جدا على عرضك للتصميمات

    طبعا مش لازم يكون فى جمال بتاعك انا قنوعة مش بتأمر

    ياللا ربنا يبارك لك فى البلوج تفيد و تستفيد ان شا الله

     
  • At 2:58 AM , Blogger Jannah said...

    Thanks for the link! Gazak Allah khayran

     
  • At 4:20 AM , Anonymous Anonymous said...

    Warm welcome to Alnemat TheGrace Arabic Christian Internet Magazine, We love you! Please visit us at:

    http://www.TheGrace.net
    http://www.TheGrace.org
    http://www.TheGrace.com

    نتمنى لكم الفرح والسلام والمحبة لأن السلام افضل من الحرب والمحبة افضل من الكراهية كما ان النور أفضل من الظلمة

    سلام لكم في محبة الله.نتأمل زياراتكم الكريمة لموقع النعمة موقع مجلة النعمة يقدم كلمة الله الكتاب المقدس الإنجيل رسالة السيد يسوع المسيح قراءات مختارة مواضيع مصيرية قصص واقعية شهادات شخصية ترانيم ممتازة ردود مؤكدة كتب بنّاءة رسوم تسالي تأملات يوميات

    Bible Read search in Arabic Studys Stories Testimonies Hymns and Poems Answers Books Links Daily devotions Acappella Music Graphics /
    Alnemat Journal Arabe Chrétien La Grâce la Revue Arabe sur Internet offre La Sainte Bible Al-Injil L’Evangile de Jésus Christ gratuit, Bienvenue a La Grâce.

    Arabic Christian Magazine The Grace offering the Arabic Bible النعمة تقدم الإنجيل الكتاب المقدس

     

Post a Comment

Subscribe to Post Comments [Atom]

<< Home